Навіны кнігарні "ЛогвінаЎ"

2-га траўня ў сераду ў кнігарні логвінаЎ адбудзецца

прэзентацыя рамана

Аляксея Талстова "Мінакі".

Аўтар патлумачыць што да чаго, нешта пачытае, адкажа на пытаньні. Колькі словаў скажуць

Зміцер Вішнёў

Кацярына Макарэвіч

Вядучая імпрэзы Вольга Гапеева. Будзе музыка.

пачатак а 19. Уваход вольны. 

Аляксандр Фядута публікуе прозу пад назвай “Мама. Горкі раман” са сваёй кнігі ўспамінаў “Мой маленькі Парыж”.

Напрыканцы часопіса караценькія агляды кніжных навінак.

фота Зарына Кандрацьева ("Будзьма беларусамі!")

Сяргей Макарэвіч з НН узяў інтэрв'ю ў Ксеніі Шталянковай, якая напісала раман для патлеткаў "Адваротны бок люстра". Перадрукоўваем.

" Ксеніі Шталянковай цяпер 19 гадоў. А свой прыгодніцкі раман «Адваротны бок люстра» напісала, калі яшчэ вучылася ў школе.

Хто паспеў прачытаць кнігу, назвалі яе адметнай падзеяй у айчыннай літаратуры,

нягледзячы на пэўныя тэхнічныя хібы. Маладая аўтарка расказала пра свой дэбютны раман.

«НН»: Вы напісалі кнігу ў 16 гадоў?

Ксенія Шталянкова: У 16 з’явіўся канчатковы варыянт. А пісала з перапынкамі дзесьці чатыры гады. У школе на ўроку беларускай літаратуры неяк прапанавалі напісаць апавяданне альбо пачатак рамана. Тады ўсплыла такая гісторыя, з’явіліся героі. І пачала пісаць.

<lj-cut text="Чытаць інтэрв'ю далей">«НН»: Чаму для рамана абралі часы Барбары Радзівіл і Боны Сфорцы, якіх таксама ўвялі ў твор?

Дзеянні рамана «Адваротны бок люстра» адбываюцца пераважна ў XVI стагоддзі. 15-гадовая Бася трапляе ў мінулае, дзе сустракаецца з 17-гадовым Міхалам. Перад тым, як трапіць назад, у наш час, дзяўчынка паспявае закахацца і папрысутнічаць на каранацыі Барбары Радзівіл.

КШ:

Тым перыядам я зацікавілася праз кнігу Вітаўта Чаропкі «Уладары Вялікага княства»,

якая трапіла да мяне ў 12 гадоў. Хацелася дакрануцца таго часу і ў сваёй кнізе.

«НН»: Гэта была першая літаратурная спроба, якая вырасла ў цэлы раман?

КШ: Гэта была першая спроба, якая пабачыла свет. Я рана пачала чытаць і мне даўно самой хацелася пісаць — прыдумваць нейкія гісторыі.

«НН»: Вы запланавалі старыць трылогію. Працяг гатовы?

КШ: Я цяпер працую над другой часткай. Спадзяюся, за лета дапішу і восенню змагу прапанаваць чытачу.

«НН»: Раман «Адваротны бок люстра» некалькі гадоў праляжаў у выдавецтвах. Чаму яго не хацелі друкаваць?

КШ:

Гэта была рызыка для выдавецтваў: я была маленькім дзяўчом, нікому невядомым. Паўставалі і пытанні з далейшай рэалізацыяй кнігі — гэта пытанне грошай.

«НН»: Кніга толькі нядаўна выйшла, а я ўжо сустракаў станоўчыя водгукі на яе ў інтэрнэце. Вы знаёмыя з рэакцыяй першых чытачоў?

КШ: Так. Нехта кажа, што проста «праглынуў» кнігу. Такое, канечне, прыемна чуць. Бо я не ведала, якой рэакцыі чакаць. Нехта прапануе ідэі для наступных кніг. Ёсць і крытычныя заўвагі.

«НН»: Як малады аўтар, як лічыце, для моладзі павінны пісаць аднагодкі, альбо і дарослыя пісьменнікі спраўляюцца з гэтым таксама добра?

КШ: Тут няма нейкага крытэрыя. Добрая літаратура не залежыць ад узросту.

Адваротны бок люстра / Ксенія Шталянкова. — Мінск: Логвінаў, 2012. — 192 с. </lj-cut>

Прэзентацыя кнігі Анкі Упалы “Дрэва энталіпт” пачнецца 20 красавіка а 19-й у галерэі “Ў” (праспект Незалежнасці, 37A).

Праграма прэзентацыі:

Урачыстае адкрыццё дрэва: Алесь Пашкевіч і Барыс Пятровіч.

Выступ сябраў суполкі kvetki_doma: Алена Пятровіч і Алена Пятровіч.

Цудоўнае з’яўленне Балахона Балахонавіча і Вавёрыцы.

Суровае рэзюмэ:

Аксана Бязлепкіна
Маргарыта Аляшкевіч

Дыфузнае яднанне аўтара з гледачамі.

Драма “Курукіца” (тэатральная пастаноўка)

Ролі выконваюць:

Курукіца: Юля Цімафеева
Дзед: Сяржук Мядзведзеў
Апавядальнік: Павел Анціпаў
Soundtrack: Уладзімір Лянкевіч

Аўтограф-сесія аўтара.

Прыходзьце самі і прыводзьце сяброў!

Гэтай фрашкі, здаецца, мы яшчэ не распавядалі. Яна пра адраджэнскіх дзядкоў.  Трэба заваўжыць, што мы іх вельмі любім і цэнім, бо яны прыходзяць да нас усё роўна як на інспекцыю і, ведаеце што? - яны маюць рацыю.

Знакам тым, завітвае ў кнігарню адраджэнскі дзядок. У кнігарні якраз ладзіцца акцыя. За раман Артура Клінава “Шалом":

 даецца каляндар з аголенымі літаратарамі задарма:

Дзядок уважліва слухае пра акцыю, старанна гартае раман Клінава і па каторым часе кажа: “Добра, падтрымаю вашу акцыю!”

Купляе раман Клінава – яму даюць у  даважак каляндар аголеных літаратараў,  і дзядок сыходзіць.

Праз пяць хвілін вяртаецца: увесь узбураны пачуццямі, задыханы. Падыходзіць да прадавачкі і, паказваючы на набыты каляндар, паўшэптам  кажа: “Там жа мужыкі!”

5 красавіка (чацвер) у кнігарні "логвінаЎ" адбудзецца прэзентацыя прыгодніцкага раману Ксеніі Шталянковай
"Адваротны бок люстра". У  імпрэзе, акрамя аўтаркі, бяруць удзел:
  Арцём Кавалеўскі

  Алена Масла

На імпрэзе прагучыць музыка ХVІ стагоддзя ў выкананні Рамана Сугакава.

Вядоўца імпрэзы – Аляксандр Карзюк, загадчык гсітарычнай кафедры БДПУ

Уваход - вольны. Пачатак а 19.



>>>  Крыху пра раман. Праз  люстра, якое яна купіла выпадкова,15-гадовая школьніца з сучаснай Вільні  трапляе ў ХVI ст., дзе знаёміцца з маладым шляхціцам Міхалам Саколічам. Гэтай пары выпадзе пабываць пры двары Жыгімонта Аўгуста і Барбары Радзівіл, ды апынуцца ў самым віры каралеўскіх інтрыг і змоваў.

Што ў нас задарма і паўзадарма ( экскурсія на 150 словаў)

Вы заходзіце ў кнігарню логвінаЎ і адразу ў перадлазніку леваруч вас чакаюць абсалютна бясплатныя кнігі на бук-кросінгу (хіба не забудзьцеся прынесці што-небудзь прачытанае наўзамен). Тым часам праваруч адкрываецца ўцешны  краявід для вока бюджэтнага пакупніка. Кнігі за 2 і 3 тысячы (часам сярод іх пракідваюцца цалкам прыстойныя кнігі, напрыклад падшыўка “Фрагмэнтаў” і “Палёт дубовага ліста” Майка Галдзянкова). Тутсама, на паліцы зверху, почасту ляжаць абсалютна дармавыя дыскі часопіса 34mag.net і каляндарыкі.

Пойдзем далей, вы мінаеце дзвюхстворкавыя дзверы і адразу-адразу праваруч бачыце палічку цалкам застаўленую 5-тысячнымі кніжкамі. Тут ужо ўвогуле песня. “Звяры-суайчыннікі” Сяргея Харэўскага, чэшскі раман “Гук сонечнага гадзінніка” (у цвёрдай вокладцы, дарэчы) і шмат чаго яшчэ.

На касе ля прадавачкі вас чакаюць бясплатныя каляндарыкі на 2012 год і закладкі прэміі  Гедройца.  

Ці варта нагадваць, што ў кнігарні самыя ніжнія паліцы аддадзеныя букіністам, дзе цэны такія ж невысокія.

Дык вось, вэлкам ту ўай-букшоп!